Magne gir seg etter 29 år i Vestnes kommune

Etter 29 år i Vestnes kommune som økonomisjef, takkar Magne Værholm for laget og går over i pensjonistrekkene. No ventar grønsaksdyrking, snekring og jakt.

I januar 1992 starta Magne Værholm som økonomisjef i Vestnes kommune. Før det var han økonomisjef på Hellandheimen i sju år. Etter 29 år i Vestnes kommune er det på tide å gi seg.

– Det har vore ein veldig bra arbeidsplass. Eg har gleda meg til å gå på jobb nesten kvar dag, seier Magne Værholm til Vestnesavisa.

Ordførar Geir Inge Lien gav han gode skussmål på kommunestyremøtet onsdag.

– Du har overlevd tre rådmenn og fem ordførarar. Du har alltid godt humør og du er flink med folk. Når du har lagt fram informasjon for politikarane eller i møte med andre aktørar har du alltid vore ærleg. Kanskje litt for ærleg til tider, seier Lien.

Spanande jobb

Magne Værholm seier det har vore 29 fine år i kommunalsjefstolen. Sjølv om det har vore hektisk på hausten med førebuing av budsjett.

– Det var lettare å lage budsjett for 25 år sidan enn i dag, seier Værholm med eit smil.

Han nemner større kommunale prosjekt han har vore involvert i og som gjer han stolt; ny brannstasjon på Helland, Helland barnehage, ansvarsreforma og Stella Maris.

– Det har skjedd mykje spanande i Vestnes dei siste 30 åra, og eg er stolt over å ha vore ein del av dette. No har eg greidd å slite ut fem ordførarar. Men Geir Inge vart for seig for meg, seier han og hausta god latter frå kommunestyret.

Gler seg til hytteliv

Når kalenderen går frå å vise 2020 til å vise 2021 vert Værholm pensjonist. Sjølv om han ikkje gir seg heilt med ein gang.

– Eg har lova å vere med på å ferdigstille rekneskapen for 2020. Og så har eg stilt meg disponibel ved behov for å hjelpe ny økonmisjef i gang i jobben, seier pengeveteranen.

Pensjonisttilveret vil Værholm bruke på hus, hytte og gardsdrift. Han har ei hytte på Kjersemfjellet som han no vil få meir tid til å bruke, og så har han eit småbruk i Lavik i Sogn. Praktisk arbeid vil stå høgt på lista over ting han vil bruke tid på framover.

– Eg har mange prosjekt eg ønskjer å bruke tid på framover. Eg vil bruke nevane og grave i jorda. Det vert nok både snekring og grønsaksdyrking, seier han.

Han er også ein ivrig hjortejeger og gler seg allereie til ein haust utan budsjettarbeid.

– Det vert nok meir jakt til hausten enn det har vore dei siste åra, seier han.