Fullsett adventskonsert på Vike

På grunn av koronareglane vart dei planlagte adventskonsertane i kyrkjene på Vestnes og Vågstranda avlyste i år. Mange tok difor vegen til Vike kyrkje søndag, der var det fullsett.

Korpsa i Vestnes har dei siste åra fordelt seg på ulike adventskonsertar, i år spelte Vestnes og Daugstad/Vike Skulekorps på Vike. Tenor Hallvard Djupvik og sopran Stephanie Lippert song klassiske og moderne julesongar, og Den Lille Messingfabrikken hadde eiga avdeling.

Lucia prosesjon

I anledning Lucia-dagen, som er 13. desember, innleia elevar frå Vike Montessoriskule konserten med vakker prosesjon. Marit Ellen Lund Salthammar akkompagnerte på piano, og soknerådsleiar Emil Balstad konferansierte.

«Selma´s Sang»

Skulekorpset hadde to eigne avdelingar, med kjente og mindre kjente julesongar. «The Polar Express» av komponisten Alan Silvestri og «The name´s Claus … Santa Claus” fritt etter James Bond (Mark Williams) er godt innarbeidd korps-reportoar. Vakre «Selmas Sang» av Thomas Stenersen og Eva Weel Skram var med, og korpset akkompagnerte Hallvar Djupvik med «Nordnorsk Julesalme». Samarbeidet mellom skulekorpset og solistane fungerte flott.

Magnus Seime Legernes var solist i «All is Calm». Magnus bur på Vike og hausta stor applaus. Han er også ein del av Den Lille Messingfabrikken, sammen med fire andre messingblåsarar. Dei gjer det bra i konkurransar, og skal til UMM i Oslo på nyåret. Dei framførte mellom anna Mozarts «Ouverture til Figaros bryllup».

«Det lyser i stille grender»

Hallvar Djupvik og Stephanie Lippert framførte også eit smakfullt utval klassiske og moderne songar, både kvar for seg og sammen. «Mitt hjerte alltid vanker», «Det lyser i stille grender» og «Stille natt», og meir moderne «Have yourself a merry little Christmas» og «Blue Christmas». Hallvard Djupvik avslutta med «O Helga Natt».

Stephanie og Hallvar viste seg fram det breie og solide reportoaret sitt på ein flott måte i denne eine adventskonserten Vestnes.