– Ingen har blitt avvist på julegudstenestene

Også denne jula vart det iverksett smitteverntiltak i kyrkjene i Vestnes. Eit av tiltaka var maks 50 personar på tilviste plassar, som medførte påmelding til gudstenester på julaftan i kyrkjene i Vestnes, Tresfjord og Vike.

I tillegg til julaftan, var det familiegudsteneste i Fiksdal kyrkje og Høgmesse i Vestnes kyrkje på 1.juledag. Høgmesse var det også i Tresfjord kyrkje og Vågstranda kyrkje andre juledag.

– Det har vore mellom 25 og 50 besøkjande på dei ulike gudstenestene i jula, og ingen har blitt avvist av dei som ynskja å komme. Alle gudstenestene har vorte gjennomført på ein flott måte innanfor dei avgrensingane som smitteverntiltaka har satt, fortel kyrkjeverje i Vestnes, Olav Egil Tomren.

Sokneprest Ellen Schiøtt preika om teksta i Lukas kalla juleevangeliet, også på andre juledag både i Tresfjord kyrkje og Vågstranda kyrkje. På Vågstranda hadde kantor Jostein Maude tatt med seg Peder Hjelvik på klarinett, der duoen skapte god musikalsk stemning.

Den høgtidelege høgmessa andre juledag i Vågstranda kyrkje, vart avslutta med songen Deilig er jorden, der siste verset lyder slik: Englane song den fyrst for markens hyrdar; skjønt frå sjel til sjel det lød; Fred over jorda, menneskje fryd deg.Oss er ein evig Frelsar født.