Knut Marius feirar romjul i Tomrefjord

På grunn av pandemien som fortsett herjar landet, vart årets julefeiring også denne gong endra for mange. Slik vart det også for vår eigen rikskjendis, Knut Marius Djupvik (34), kona Maria Valseth (34) og borna Heine (4) og Vilja (2), som alle fekk endra planane sine i siste liten.

Vestnesavisa fekk ein prat med den alltid blide og omgjengelege artisten, som saman med familien var på romjulsbesøk heime hos foreldra i Tomrefjord.

– Korleis har du og dine fått feire jul denne gong?

– På grunn av smittesituasjonen, så måtte vi i år igjen avlyse turen til Tomrefjorden på julaftan. Derfor vart det julaftan med kone og ungar i Oslo for andre året på rad. Det var veldig koseleg, men sjølvsagt tungt at planane vart endra i siste liten endå ein gong. Andre juledag vart det derimot forsvarleg å ta turen oppover, så no er vi i Tomrefjord og feirar jul saman med besta og besten. Å det er alltid veldig fint, seier Knut Marius.

Han legg til at pappa hadde faktisk klart å spare ein liten del av pinnekjøtet til barnebarna sine.

– Kva blir dine planar i det nye koronaåret?

– Dei fleste av planane for januar og februar er avlyste eller flytta. Det er sjølvsagt ikkje noko artig. Eg trudde ikkje vi skulle heilt tilbake til slike situasjonar. Men, men, slik vart det. Den 25.februar dreg eg derimot ut på turne med eige band i heile noregs land. For vestnesingar er det Teatret Vårt i Molde og Terminalen i Ålesund som gjeld den siste helga i februar, om nokon vil få med seg dette, Seier Knut Marius.

Han tykkjer det alltid er kjekt om det kjem folk frå heimplassen for å høyre på han. 19. mars skal han synge heime på Idahall i Tomrefjord.

– Er det noko meir du vil dele med Vestnesavisa sine lesarar?

– Eg håpar at det blir andre tider, slik at det går an å få til morosame aktivitetar i Vestnes. Vidare at vi kan arrangere artige arrangement og få til samlingspunkt som kan gje minner for livet. Det er eg verkeleg interessert i å få til, og eg gler meg veldig til dette skal være mogleg, avsluttar Knut Marius Djupvik i Tomrefjorden, som må haste vidare for å leggje borna sine.