Vestnesfolk om året som har gått og håp for 2022

Medan pandemien herjar, straumprisane stig og renta aukar, teste Vestnesavisa temperaturen på nokre forbipasserande like før vi går over til eit nytt år. Vi stilte følgjande spørsmål:
1. Har du tru på vår nye regjering inn i det nye året?
2. Korleis vil du oppsummere året vi no har lagt bak oss?
3. Har du nokon nyttårsforsett eller planar for 2022?

Oddvar Gjelstenli (38), Sivilingeniør, Øverås.

1.– Nei, eigentleg har eg ikkje trua. Det var ikkje dette eg stemte for i siste valet.
2. – Eit vanskeleg koronaår med heimekontor, tiltak og testing.
3. – Då satsar eg på reiser og auka aktivitet.

Hans Petter Bjering (62), dagleg leiar i Bjering Maskin, Vågstranda

1. – Nei, enkelt og greitt.
2. – For meg personleg har det vært eit alminneleg år, utan å merke stort av pandemien. Det har sjølvsagt vore lite av offentlege arrangement, men festivalar har me skapt sjølv.
3. – Eg har ingen store planar. Det får bli som det blir.

Bodil Svensli (68), heimehjelp i Vestnes, Skorgen

1. – Eg har dessverre ingen tru på dei som har teke over no.
2. – Ein kamp for å holde seg frisk, og at koronapandemien snart må ta slutt.
3. – Målet er at helsa må halde, og at eg får arbeide så lenge eg klarar.

Bjørn Tore Rødal (58) og Wenche Johansen (60), Måndalen

1. – Nei, eg likte ho Erna og Høgre så absolutt best, svarar Wenche. Bjørn Tore nikkar.
2. – Dritlei covid.
3. – Vi satsar på ein kjempeferie når pandemien endeleg er over.

Kåre Oddvar Kjersem (61), bussjåfør, Tresfjord

1. – Nei dessverre, dei lovar og lyg.
2. – Eit år med korona har hatt lite påverknad på meg.
3. – Eg har ingen spesielle planar utover det å restaurere eit hus i Tresfjord.

Mary Irene Moen (80), husmor, Vestnes

1. – Starta skeptisk, men begynner å få litt betre trua på dei no.
2. – Mi største oppleving dette året var å bli oldemor til mitt sjuande oldebarn. Elles har eg teke dei tre vaksinane og er glad for å fått halde meg frisk.
3. – Eg har ingen planar foreløpig, sidan pandemien har teke seg opp att.

Gro Hegdal (61), frisør, Vikebukt

1. – Tja, det får vise seg, sjølv om eg ikkje stemte fram dagens Regjering.
2. – Eg må seie eg har hatt det bra. Som frisør treff eg mange forskjellige folk, som mettar dei fleste av mine sosiale behov.
3. – Same planar som eg hadde for det året som no er over, altså ikkje noko spesielt, seier frisøren som bur på Vikebukt og jobbar i Tresfjord.