Hyllar overgrepsutsette med rapplåt

Stridmøya heiter den nye rapplåta til sokneprest John Sylte. Han har skrive låtar før, men aldri gjort det så skikkeleg som denne gongen.
– Det er ein hyllest til alle overgrepsutsette som eg har snakka med, og handlar om kampen for å ta livet tilbake, seier han.

Stridsmøya er namnet på ein kvinneleg krigar frå vikingtida. Songen John Sylte har laga handlar også om ein krig.

– Den handlar om ein tøff oppvekst, sjølvskading og kampen for å kome seg ut av det, fortel han.

Inspirert av Bjørn Tomren

Det var då John Sylte såg Bjørn Tomren rappa Long time coming på Stjernekamp han fekk inspirasjon til å lage ei eigen låt.

– Rapp er ei uttrykksform eg likar veldig godt. Eg har skrive eit par rappar, men ikkje gått så skikkeleg inn i det som eg har gjort no. No har eg fått litt rettleiing med ein proff som heiter Lars Frønes. Jonas Høgseth har skrive melodien, korar med på refrenget og har hjelpt til med innspelinga, fortel presten.

I løpet av februar kjem låta ut, slik at den blir mogleg å strøyme på Spotify og andre musikkstrøymetenester.

Dobbel straff

John Sylte har vidareutdanning som psykotraumatolog. Han er den som treff folk i si djupaste sorg. Han har også snakka med mange menneske som har vore utsett for overgrep og valdtekt.

– Dei ser gjerne på seg som svake, men eg meiner at dei heller er sterke. Dei er heilt råe. Stridsmøya handlar ikkje om ei kvinne, men er samansett av alle kvinner og menn som har vore gjennom denne krigen. Det gjer noko med sinn, kropp og sjel og bli utsett for overgrep. Mange blir også så «kødda til» i hovudet, at dei kjenner skuld og skam over det som har skjedd, seier John Sylte.

Han meiner det blir som ei dobbel straff.

– Når skuldkjensla ligg i forgrunnen, vert det for mange også vanskeleg å oppsøke hjelp. Dei er redd for ikkje å bli trudd, eller for å bli dømt, seier Syllte.

Han seier det er lov å synast synd på seg sjølv, men det hjelper ikkje å gjere det.

– Det er ein veldig til kamp å bli utsett for overgrep, men ein kan lære seg å leve med traumane, seier han.

John Sylte fortel at han har samarbeida ved Senter Mot Incest og Seksuelle Overgrep i Molde, og at han også hjelper folk å søkje behandling for det dei har opplevd.

– Ein kan få kontroll på det som triggar traumane. Jobbe seg gjennom det, vinne meir og meir terreng og på den måten ta livet tilbake litt etter litt, seier han.