No skal Tresfjord trygdeheim seljast

Ein eigedomsmeklar har gjort ei verdivurdering av Tresfjord trygdeheim som vart nedlagt i april i fjor. No skal eigedommen seljast.

I kommunestyremøte frå 16. februar i 2017 blei det vedteke at formannskapet i Vestnes kommune fekk mynde til å selje trygdeheimen til rimeleg pris mot eit lokalt konsept. Dette kunne fyrst skje etter at det nye helse- og velferdssenteret vart tatt i bruk.

Tresfjord trygdeheim blei diskutert på ny under eit kommunestyremøte sist haust etter ein førespurnad frå Senterpartiet og Arbeiderpartiet.

Her vart dei einige om å ikkje setje i gong med salsprosessen før dei lokalt gjorde undersøkingar med omsyn til moglege etableringar og innan kultur/næring som var lokalt forankra.

Salsprosessen er i gong

Øysten Hole, saksbehandlar i Vestnes kommune, opplyser til Vestnesavisa at ein eigedomsmeklar no har gjort ei verdivurdering av Tresfjord trygdeheim.

– Det er ein vanskeleg eigedom å vurdera, det avheng av tilstanden på bygget og ikkje minst kva marknaden er villig til å gi, men meklaren har føreslått 2,2 millionar kroner, seier Hole.

– Har nokon meldt sin interesse?

– Det som eg veit om er at ei samanslutning av kunstnarar har vore å sett på bygget, noko meir enn det har det ikkje vore, seier Hole.

Vidare fortel han at eigedommen ikkje er lagt ut for sal enno. Kommunen skal fyrst foreta opprydding og tømming av bygget.