Ny sjef på Europris: – Alt er mogleg berre ein vil det

For tre år sidan byrja Sandra Therese Vik Nybø (26) frå Tomrefjord som ekstrahjelp på Europris i Elnesvågen. No er ho ny butikksjef på Europris Vestnes.

Det er litt tilfeldig at den unge dama frå Tomrefjord hamna på Europris. Sandra fortel at ho hadde ein kollega på restauranten Egon i Molde, som fekk seg ei sjefsstilling på Europris i Elnesvågen. Det var denne kollegaen som ville ha med seg Sandra dit, og tilbydde ho arbeid som ekstrahjelp.

– Eg byrja som ekstrahjelp, men har arbeidd meg opp til ei stilling som assisterande butikksjef på Europris i Elnesvågen. Eg har heilt sidan starten arbeidd målretta for å bli butikksjef. Eg vart difor veldig glad då eg fekk denne jobben. Det viser at sjølv ei stilling som ekstrahjelp kan gje gode moglegheiter, smilar ho.

Like butikkar

Dei siste åra har Sandra budd i Molde, men rett før jul flytta ho heim igjen til Vestnes.

– Eg starta i stillinga 3. januar, og førebels bur eg med ei venninne. Men eg skal busette meg her i Vestnes igjen, fortel ho.

Sandra fortel at det er til saman elleve tilsette med stort og smått på Europris i Vestnes.

– Er det noko forskjell på Europris i Elnesvågen og på Vestnes?

– Nei, dei er veldig like. Det fine med Europris er at uansett kor du er, så finn ein dei same varene i dei same avdelingane. Eg kan difor alt frå før om dette, seier ho.

Europris på Vestnes vart opna i april 2019. At det er blitt ein populær butikk, er det inga tvil om.

– Den er godt besøkt. Eg høyrer også ofte på gata at folk seier dei er glad for at Europris kom til Vestnes, seier den nye butikksjefen på Vestnes.