Årets fyrste siger for Vestnes Varfjell

Blåtrøyene tok sin fyrste siger for sesongen og vann 4-1 borte mot KFK/CFK (Kristiansund Fotballklubb og Clausenengen Fotballklubb) i går fredag.

Vestnes Varfjell kunne juble høgast etter kampen på Kristiansund stadion fredag då KFK/CFK måtte reise den korte turen heim med null poeng.

Blåtrøyene skriv på si heimeside at heimelagets målmann Anders Gausen måtte gå av bana med raudt kort etter tolv minutt, etter å ha tatt ballen med hendene utanfor eigen 16-meter. Etter dette gjekk det i nedoverbakke for kristiansundarane.

Tor-Bjarne Løvik Salte og Liam Connor skåra for Vestnes Varfjell før pause medan KFK/CFK sin spelar Ali Hamod reduserte på straffespark like før pause.

– Det løyste seg offensivt

I andre omgang såg ikkje Vestnes Varfjell seg tilbake. Fyrst var det Adrian Kosinsk som runda keeper og satte inn 3-1 halvvegs ut i omgang før Elling Olafsen fastsette sluttresultatet med 4-1 ikkje lenge før slutt.

Trenar Alexander Connor seier til Vestnesavisa at Vestnes Varfjell spelte ein veldig god kamp.

– Det løyste seg for oss offensivt, det var det som gjorde utslaget. Vi spelte bra mot KBK 2 også, men blir hardt straffa. Eg synst vi hadde fortent meir i den kampen. Vi var også best mot Åndalsnes i store delar av kampen, seier Connor.

Vidare nemner han at sjølv om det vart full klaff i fredagens kamp so sløste dei med sjansane. Dei produserar også mykje og spelar offensiv fotball.

Det hjelpte rett nok at dei spelte mot ti mann i store delar av kampen, men det var tydeleg frå starten at Vestnes Varfjell hadde bestemt seg for å vinne.

– Kva trur du er årsaka til at det løyste seg mot KFK/CFK?

– Vi er eit veldig spelande lag og har særs gode ballspelarar sentralt i bana vår. Det blir bra når kombinasjonane er gode mellom ving, spiss og backspelarar. I gårsdagens kamp blei det mykje bevegelse og mange ting som skjedde på ein gong. Då er det lettare å produsere sjansar, seier Connor.

Han legg også til at spelarane kanskje var meir konsentrerte mot motstandarane i går enn dei kanskje har vore tidlegare i sesongen.

Neste kamp for Vestnes Varfjell er måndag 23. mai, då kjem Træff 2 på besøk.