Svært positivt – håp om fastlandssamband
At regjeringa no endeleg har gitt Statens vegvesen marsjordre om å sjå på gjennomføringsrekkefølga for Møreaksen er svært positivt og gir håp om fastlandssamband og bygging av Kjerringsundet. Ei utredning av gjennomføringsrekkefølga vil i tillegg til å løyse ein svært krevjande trafikksituasjon i Molde, bidra til realisering av Kjerringsundsambandet og ikkje minst vere det første steget mot ein større, sterkare og meir konkurransedyktig bu -og arbeidsmarknadsregion. Dette er vinn – vinn for alle partar.
Aukra kommune har over lengre tid kommunisert behovet for utbygging av fastlandssamband i samband med beredskap og då spesielt knytta opp mot ilanføringsanlegget på Nyhamna som både nasjonal og internasjonal samfunnskritisk situasjon. Det er nasjonen sine interesser og ansvar og ikkje Aukra kommune å sørge for tilgjengelegheita til Nyhamna er optimal. Med dagens fergeløsying veet ikkje dette ivaretatt.
For Aukra kommune er og dagens løysing med ferje og dermed stengte veg 85% av døgnet svært krevjande med tanke på å legge til rette for ei samfunnsutvikling som møter næringslivet sine behov, samt å optimal tilrettelegging for ein fleksibel og effektiv bu – og arbeidsmarknadsregion i ei framtid med stadig færre yrkesaktive. Fastlandssamband vil auke attraktiviteten rundt både det å bu og flytte til Aukra kommune, eit svært viktig perspektiv med tanke på mellom anna rekruttering av kompetanse til kommunen.
Det er no viktig at ein står saman om å sikre god framdrift i utredninga til Statens vegvesen og at ein i vår region står saman om ei felles løysing for realisering av Møreaksen og Kjerringsundsambandet. Det som no har skjedd gir håp om at vi i fellesskap vil kunne få Møreaksen inn på eit spor kor vi ved komande rullering kan få oppstartsmidlar til realisering av Møreaksen.
Helge Kjøll jr.
Ordførar Aukra kommune
