Slik handterar du fyrverkeri

Fargerike Sivertsen deler sine beste tips om korleis du handtera fyrverkeri.

PANG! Du ser opp mot himmelen, følgje smellet. Fyrverkeri kan vere vakkert, men samstundes farleg. Sikkerheit er det viktigaste.

Det er enno litt tid til nyttårsaftan, men sikkerheitstips kjem aldri for tidleg.

Vestnesavisa tok turen bort til Fargerike Sivertsen for å høyre om nettopp det, sikkerheitstips. Dei har akkurat vore på kurs om fyrverkeri.

Deira beste tips

Sindre Sivertsen og Håkon Weiberg Olsen deler gjerne sine tips for korleis ein skal handtera fyrverkeri.

– Kva er dokkar beste tips for avfyring av fyrverkeri?

– Følgje reglane, les deg opp før du tenner på. Vær edru og bruk sikkerheitsutstyr, seier Weiberg Olsen.

– Det er alltid lurt å sjå over ting du skal skyta opp og du bør vite kor lunta er. Gjerne forbered oppskytingsplassen, planlegg det littegrann sånn at du ikkje berre går ein plass. Ta ei vurdering tidlegare på kvelden kor det er lurt å skyta opp. Og bruk vernebriller og ha god avstand til hus, forklarar Sivertsen.

Kvart femte år

Sivertsen og Weiberg Olsen står i rommet der dei oppbevarar og sel fyrverkeri. På hyllene finn vi alt slags fyrverkeri, til store og små. Kurset dei nettopp har vore med på handla om fyrverkeri.

Sivertsen har seld fyrverkeri i 40 år. – Eg byrja å selje fyrverkeri når eg var åtte år. Då stod eg oppå to spann med fjøler på og selde ut frå disk.

– Kor ofte må dei som sel fyrverkeri på kurs?

– Kvart femte år, seier Sivertsen. Eit løyve varar fem år før du må ta nytt kurs. Det går mykje på oppbevaring og mengde, forklarar han.

Sindre legg til at dei har fyrverkeri ute sidan det er leilegheiter ovanfor butikken. Dei har samstundes eigen container.