Topp laurdag for over 300 på Ørskogfjellet

5-årige Torstein Utgård Skjegstad frå Skjegstad og 82-årige Ola Rotnes frå Sjøholt står slalåm i same bakke. Styreleiar i både Ørskogfjell Skisenter og Ørskogfjell Skilag, Marianne Sæther (52), strålar som ei sol over at skisenteret får vise at dette er eit familievennleg tilbod som passar alle. Sesongen starta 4.juledag. Laurdag hadde dei over 300 besøkande.

Torsteins storebror, Ole Martin Utgård Skjegstad og kompisen Franz Amdam Wirthenstatter frå Vestnes, som begge er 11 år, fortel at dei også sto på slalåm i 5-årsalderen, men er einig i at alle må lære seg teknikkar før dei står i den store bakken. Etter ein prat i varmestua, konkluderar dei med at Ørskogfjell Skisenter er ein fin plass med gode forhold, godt føre og eit kortreist tilbod.

11-årige William Dolpen Falch frå Vestnes, har ikkje stått på slalåm før. Denne laurdagen er hans første besøk ved skisenteret, der han får teste ut og prøvekjøre i treningsbakken.

– Det går nok ikkje lenge før eg må ta heisa til storbakken, seier hans far Erling Falch, som kjem ifrå Smøla, men busett i Vestnes.

Treng snø og fleire vakter

Marianne Sæter har det travelt i biletluka, men like blid. Her tek ho imot alle som skal kjøpe heiskort eller fornye. Ho hjelpar dei som har mista korta sine, og forklarar korleis betalinga på parkeringsplassen fungerar. Ho fortel at alle er velkomne innandørs til varmestua som sel både vått og tørt, varmt og kaldt.

– Endeleg er vi i gong og enda betre er det å sjå at både liten og stor, ja heile familiar trivast her. I tillegg til helg har vi kveldskøyring tysdag og torsdag. Sjølv om det er fine forhold no, so treng vi mykje meir snø. Derfor er det synd at skiheisen ikkje kan ta med folket heilt til toppen denne helga, men dette håpar vi skal rette seg, seier Marianne Sæter, som legg til at dei også treng fleire frivillige vakter.

Som takk får dei heiskort til seg sjølv og familien.

82 åring i slalåmbakken

– Eg har vel aldri vore ein idrettsmann, men vore aktiv innan alpint sidan barneåra. No er eg glad for at eg fortsett kan stå slalåm, og eg er stolt over å ha eit slikt anlegg i nærområdet, seier Ola Rotnes, som ikkje ynskjer merksemd om hans aktivitet i skibakken.

– Dette er vår sprekaste mann i skibakken, fortel 75-årige Frode Håskjold, som sjølv er frivillig ansvarleg for trakkemaskina

Han legg arma si over skuldra til 82-årige Ola Rotnes, som bekreftar at han har stått slalåm her sidan oppstarten i 1972.

Den 75-årige trakkemaskinansvarlege, fortel at han også er med å køyrer løyper ut til Jutevatnet, og at han stortrivst med jobben som pensjonert frivillig.

Både Rotnes og Håskjold som begge kjem ifrå andre sida av fjellet, er stolte over å vare ein del av dette fantastiske familietilbodet som kan samle alt frå dei minste til dei eldste. Dei er også opptekne av dugnadsanden, som er heilt avgjerande for at drifta skal fungere.

Røde Kors, ein naudsyn ressurs

Arbeidet som Røde Kors legg ned, er noko styreleiar Marianne Sæter ikkje kan fullrose nok. Vestnesavisa møter dei ved hytta like ved, der dei er utstyrt med allverdens utstyr. Dei står også klar med ein bil, dersom dei får oppdrag andre plassar.

Karl Johan Eik Dyrkorn (21), som er operativ leiar i Tresfjord Røde Kors Hjelpekorps, fortel om fint vær og lite skade. Saman med dei fire han har med seg, fortel dei at dei ser viktigheita av å vare til stades, sjølv om det i periodar er langt mellom skadar.

Felles interesse viskar ut den store aldersforskjellen, og gjer det kjekt å vare saman, seier den eldste i gruppa, Ingrid Malin (43). Dei tre andre, Camilla Blom-Malin (16), Bernt Skjegstad (22) og Eirik Lindheim Brastad (21) fortel om både samhald, trivsel og viktigheit.

Så lenge det er nok snø og nok frivillige vakter, vil det fortsett vare stor aktivitet i skibakken.